Exo 24 | HMO | STEP | Lohiabada ese Mose dekenai ia hereva, ia gwau, “Ororo dekenai oi daekau mai lau dekenai, oi bona Arona, Nadaba, bona Abihu, bona Israela tau badadia 70, sisina daudau lau dekena amo do umui tomadiho.

Exodus 24

Lohiabada ese iena gwauhamata taravatuna ia hamomokania

1 Lohiabada ese Mose dekenai ia hereva, ia gwau, “Ororo dekenai oi daekau mai lau dekenai, oi bona Arona, Nadaba, bona Abihu, bona Israela tau badadia 70, sisina daudau lau dekena amo do umui tomadiho. 2 Mose sibona be lau kahirakahira do ia mai, haida be lau kahirakahira dekenai do idia mai lasi, bona taunimanima ta ese Mose danu do idia daekau lasi.”

3 Vadaeni Mose ese Lohiabada ena hereva bona iena taravatu ibounai ia hadibaia taunimanima dekenai. Israela ena taunimanima ibounai be nega tamona idia haere, idia gwau, “Ai be Lohiabada ena hereva ibounai do ai karaia.”

4 Mose ese Lohiabada ena hereva ibounai ia torea. Daba maragi ia toreisi, ororo ena henuna kahana dekenai boubou patana ia karaia, bona laloatao nadi 12 ia haginia, Israela ena iduhu 12 edia. 5 Vadaeni Mose ese Israela tatau matamata haida ia siaidia, idia ese boromakau tau idia mailaia, boubou gaudia dekenai idia halaoa, boubou be rua, ta be lahi ese ia gabua ore momokani ena boubou, ta be maino karaia boubou Lohiabada ena. 6 Vadaeni Mose ese rara kahana ia bubua disi lalonai, to rara kahana ia negea lao boubou patana ena latanai. 7 Unai murinai gwauhamata taravatuna ena buka ia abia, Lohiabada ena oda hereva unai, bona Israela taudia edia vairana dekenai ia duahia hedinarai. Vadaeni idia gwau, “Lohiabada ena oda hereva ibounai do ai karaia, bona do ai kamonai henia.”

8 Gabeai Mose ese rara, disi lalonai gauna ia abia, Israela taudia edia latanai ia negea lao, ia gwau, “Inai rara ese Lohiabada ena gwauhamata taravatuna, umui danu ia karaia gauna ia hamomokania, inai buka ena hereva ibounai hegeregerena.”

9 Vadaeni Mose, Arona, Nadaba bona Abihu bona Israela tau badadia 70 danu, ororo dekenai idia daekau. 10 Israela ena Dirava idia itaia. Iena aena henunai be nadi namo herea, mai edia diaridiari idia noho, edia toana be bulu, guba bamona, ori ese idia koua lasi neganai. 11 Inai Israela tau badadia ese Dirava idia itaia, to ia ese ia hadikadia ore lasi. Vadaeni Lohiabada ena vairana dekenai idia aniani hebou.

Mose Sinai Ororo dekenai

12 Lohiabada ese Mose dekenai ia hereva, ia gwau, “Lau dekenai oi daekau mai ororo dekenai, lau dekenai oi naria. Lau be nadi palaka rua oi dekenai do lau henia. Inai nadi edia latanai taravatu bona oda lau torea vadaeni, taunimanima dekenai do oi hadibaia totona.” 13 Vadaeni Mose mai ena hesiai tauna Iosua danu idia toreisi, idia daekau Dirava ena ororo dekenai. 14 Mose ese Israela tau badadia dekenai ia hamaoroa, ia gwau, “Iniseni do umui naria noho, ela bona ai giroa mai umui dekenai. Arona bona Huru be umui dekenai idia noho, bema kerere o hepapahuahu ia vara neganai, idia ese kota do idia karaia.”

15 Mose ese ororo dekenai ia daekau, vadaeni ori ta ese ia koua. 16 Lohiabada ena hairaina be Sinai Ororo ena latanai ia diho, bona ori ese ororo ia koua ela bona dina 6 ia ore. Dina namba 7 neganai Lohiabada ese Mose dekenai ia boiboi ori dekena amo. 17 Lohiabada ena hairaina be Israela taudia ibounai ese idia itaia, be lahi bada herea bamona, ororo ena ataiai dekenai. 18 Mose ese ororo dekenai ia daekau, ori lalonai, bona dina 40 bona hanuaboi 40 edia lalonai unuseni ia noho.